الأشتر .... وســـلام يا بلد

[الأشتر]

الأشتر .... وســـلام يا بلد

جات إجازة المدرسة الكبيرة .. وأنا في داك الزمن صبي متل (البغل) حسب قول عمي (البدوي) وفي مرة كدي شافني قال لي : والله يا الأشتر تنفع يربطو عليك (كارو) .. ورقدت بعدها بي (حمى ووجع بطن) وما فكاني من عينو الحارة دي إلا (حقن ملاريا) أدوني ليها في (الهستبيسه سكلنص) حتين شميت العافية (وشكيتو علي الله وأرفقت صورة لحقوق الإنسان) .. وكان باقي لي سنة وأمتحن لي للجامعة .. بس ما منكد علي عيشتي إلا اللجازة البسوها كلها (كورسات وتقوية ) وودير قروش في الورق ساكت (يريتو يجيب مريسة تامزين) في شان الإمتحانات ديك تطير عيشته.. أهان قلت أشوف لي شغله أطلع منها حق (القراية) وبعدها أقرأ لي كورسي كده في (الخرتوم) باقي ناسي في البلد راجيني أطلع (أفندي) ..
وبي وشي جيت مندرج (الخرتوم) باقى عندنا قريباً لينا (مقاول) بتاع بنيان وقديم في الشغلة دي .. ومن تاني يوم وأنا (طلبه) بي درجة مهندس معماري ...
وبعد كم يوم من الشغل كان شغلنا (ترميم) في بيت واحد مرتاح من نوع (البفطر شاورمة ويتغدى باسطرمة) مو زينا الغبش ( تحليتنا قاورمة) زول كرشتو زي (علامة إستفهام) .. جلابيتو تسوي (ناموسية) .. أهان بيتو عليك أمان الله أنا قايلو (قاعة الصداقة) .. شيتن بلاط وشين سلالم وشيتن أنوار مقلوظة .. في زمتي الديوان كت قايلو (مسجد النيلين) فوقو (تمنية كيعان) ونجفتين وبرش .. علا ناس الخرتوم ديل عندهم (الجن والغباء) العصرية كدي يشلوا الشاي يشربوهو في (راس البيت) قلت في خاتري يمكن يخافو (الضبان) .. حقيقة كيفهم (عالي).. أهان قلت لي قريبي (المقاول) : في زمتك هسي ده بيت (يرمموهو) ؟ يسووا فيهو شنو ده هسي ؟ علا كان دايرنه نغسلو ونكويهو ساكت قال لي : ياهن كدي ناس القروش قروشن مغلباتنهم قلتلو : دي متل (البنيه السمحة) بي سماحته وتدور تمشي (الكوفير) !! .. وبدينا الشغل هو كان بنيان عتبات كدي في البيت ..
وبيني وبينكم لامن بدينا الشغل عندهم (بنية) تبارك الله (تقول مزروعة في شارع النيل) فارعة ورويانة .. (عيونه) تشغل (أستديو) .. لابسه شيتن كدي أظنو كان بنطلون وإنكمش ولا أظنو كان رداء وإنمطه مو خابر .. بالظبط كدي حلحلت صواميل مخي وخلت رموش عيوناتي يتطاقشن وباقي لي نفس الحمى ووجع البطن تاني رجعن فيني .. بت من نضافته تقول مجيره (بوماستيك) جات وجابت لينا (شربات) سبحان الله أول مرة أشوف لي شربات (كاروهات) .. قلت لي (المقاول) : ده شنو : شربات (ملاح قرع) ؟؟ قام (صره) لي وشو .. أنا قمت إتخاففت وقعدت أناضم البنية وأشكر ليها في (شرباته) وهي تتبسم وأنا قلبي (إتعسم) و(كروريات الدم الحمراء والبضاء إتلخبتن لخبتت شرباته دي) قمت سألتها من اللبس الفيها ده .. بلصقوهو لصيق ولا كيفن طريقتو .. قالت بصوت يروب المويه كدي .. ده (بودي وير) .. أنا قايله قالت لي (ياعوير) قمت سكت وقلت ليها .. كتر خيرك وبارك الله فيك .. غلتان أنا السألت ..
أها وفي غريفتن كدي في ركن البيت تشوفه من بعيد تقول مو تبع البيت السمح ده .. مهايره وشوينه كدي قلت قطع شك ده (تكل عواسه) أو يكونوا مربين فيها أكان (جداد ولا كان حمام رقاص) وأنا بالحيل بريد السعية قلت أمش أشوف سعيتهم متل سعيتنا وله (متحنكشة برضو) قالوا باقي جداد الخرتوم بكاكي (نغمات) .. ومشيت لي شلاقتي قلت أتاوق من الشباك وأشوف .. وفعلاً من الشباك أشوف ليك منظر غريب واحدة عجوزة راقدة في (عنقريب) مختوته في نص الأوضة كدي متل (طربيزة البنغ بونغ) وخاتين جنبها مصلاية وأدوية .. وأنا منشحط واقف ومستغرب في المنظر والغرفة الضيقة دي .. قطع سرحاني مرور نفس البنية بتاعة (الشربات) ودخلت الغرفة ومعاها صينية فطور .. قامت (الحاجه) شافتني قدام الشباك وقالت لي : حبابك أجنا أدخل أتفضل بارك الزاد .. وسألت (البنية ) عني .. قمت دخلت وطايبتها وسالمتها وهي بحنية أهلنا في البلد سالمتني ورجعتني لمحنة كنت فاقدها وطيبة غير موجوده إلا في (حبوباتنا الكبار) .. قمت سألت البنية : منو (الحبوبة) الخاتنها هنا دي.. قالت لي دي (حبوبه) أم (بابا) قاعدة معانا لانو ماعندها زول تقعد معاهو غيرنا .. قلت : وليه قاعده هنا في الأوضة الصغيرة وما قاعدة معاكم في القصر الواسع ده .. قالت : هي بنفسها قالت هنا أريح ليها .. وبعدين نحن طوالي معانا ضيوف (هاي) أصحاب (بابا) و (ماما) و(صاحبات) ماما كلهم (برستيج) عالي ... قلتله : يعني بالواضح كدي : إنتو خجلانين منها وفي شان كدي داسنها من الناس (البرينسات القلتيهم ديك) .. قالت لي : لا مش كده بالضبط أهو نحن بنخدمه وأنا بحبها وبجي أونسه شوية وحتى كمان (بسرح ليها شعرها) .
قلت : يا بنية (المحبة) مو أكل وشراب وونسة .. المحبة في القلب .. المحبة تقدير .. قسماً بالله لو تعرفي معزة وبركة (حبوبة) كان سويتو ليها (تمثال) وختيتوهو فوق روسينكم .. والله نحن حبوبة ... نعزها ونحبها .. نصبحه .. ونماسيها .. نشاوره ونفقده .. نراضيها وتراضينا .. هي نورنا ولينا .. هي دفانا وغطانا .. هي بركتنا ودعانا .. هي خطوتنا ومرسانا .. نطول ونتشابى .. ونرجع تاني لي رايه .. هي حقيقتنا وحجوتنا .. أصلنا وفصلنا .. هي جزورنا وضلنا .
يا البنية .. الشجرة المزروعة خير بتقوم وتولف وتثمر .. والشجرة المزروعة شر بتموت في جزوره .. دحين خلي بالك على حبوبتك وراعيها .. ترا باين فيك الخير ..

سرحت وإتذكرتك يا بلد .. وشاي الصباحية .. وهبهبة صاج اللقيمات .. ولمتنا في طريف توب (حبوبة) .. ومتيقن إنو الحضارة أصلها تراث ..



نكته خارج الإطار

مره بتونس مع حبوبتي .. قلت ليها .. أنا بدور أدرس طيران
قالت لي : أها المطرطش أكان أبوك قراك طيران .. البشتريلك الطيارة منو ؟؟

[سيف]

انا ما شفت مشاركاتك التسعة لكن بالصدفة كرعيني جابتني بي جاي وعجبتني بالحيل مشاركتك دي ارجو انك تواصل في الزي دة والحقيقة زي ما قلت البركة في حبوباتنا والمنظر الحكيتو لينا دة بصراحة متكرر في بيوت الخرطوم وشوف عيني دي ما قالو لي حتى في البيوت الخردة تلقى المخزن المطرف زاحين حاجاتو بالجنبات وحاشرين عنقريب حبوبتم فيه .. غايتو ناسنا لمن يقومو للفلقصة حقهم اشتر .. ما لا الطيبة والبساطة حتى للربنا وسعا عليه وعمل فلا ولا عمارة .. الناس بقت بعيدة من الدين والايمان والتقوى .. البشم ريحة قروش بنسلخ طوالي من جلدو ..

[المسافر]

سلام يا الأشتر
كلامك والله يسعد ويبسط
وحكاويك فاتت حكاوي حبوبتنا - بت السرور -
سلمت أيديك يا صاحب القلم الرفيع

إلا داير أسألك
أنت قاعد تطش وين يا الشقي
أبقى بي قرب

[الخواجه]

الأشتر

ما شافو عظمة الحبوبات عندنا
القروش تعمل أكثر من كده

[مشاكس]

الأشتر

إنت يا كافي البلا ديما في البلاوي واقع
بعدين البت دي ما كنت تشوفا تعرسا
طالما الحبوبة موافقه ومرتاحه ليك
يمكن ربنا يرفعك شويه

[بربراوية]

لـــــــــــــــــــيه الغيبة يا أشتر

بارك الله فيك دايما مبدع