العبيدية تحتضن الباوقة ... وإستغاثة اهلنا بطوكر وا مساعدتاه من الفيضانات

[الفاتح الزبيرابي]

يواصل النيل العظيم فيضانه وطوفانه وعلى وجه الخصوص بولاية نهر النيل لانها الولاية الاكثر انخفاضا من مستوى سطح النيل ... وقبل قليل كنت اتحدث الى الأهل بالعبيدية عبر الجوال وعلمت ان النيل طغى على الجزر الواقعة بين العبيدية والباوقة تماما ويستطيع الانسان من العبيدية ان يتحرك الى الباوقة مباشرة عبر القوارب النهرية والمراكب الشراعية يعني باختصار كدا من ( حلة الهدباب مثلا وعلى مقربة من بيتك تركب القوارب النهرية وتتحرك الى الباوقة ) عجبي اين حكومة الولاية ؟؟؟ ...

اما اهلنا في طوكر فحالهم يحزن ويبكي ويدمي القلوب التي لا تعرف الرحمة فقد غار نهر اربعات على اهلنا ( الكمالاب والكميلاب والهدندوة والبشاريين وبقية القبائل ...) في شرقنا الحبيب واستطاع تدمير منازلهم وفقد مواطني هذه المنطقة جميع ممتلكاتهم .... سؤالنا اين الحكومة من هذه الكوارث وماهو الدور المفروض القيام به عااااااااااجلا ... نسال الله ان تكون امطار خير وبركة ورحمة ....ودمتم

[محمدطاهرالعباس]

التحية لك الزبيرابى وأنت تتابع الموقف من على البعد وهكذا شيمة أهل الهدباب . أطمئنك بأن الوضع تمت السيطرة عليه ومنذ الأمس واليوم هناك أنحسار واضح فى النيل والأتبراوى

[ابونضال]

اللهم ربنا يسر ولا تعسر

[katah]

ياناس بطيخنا ست غرق

[محمدطاهرالعباس]

غراق البطيخ هين .. الكلام غراق البياكلوهو

[علي جارالنبي]

اللهم أجعلها نعمةً بلا بلاء

[العبيدية]

اللهم اجعلها فيضانات خير وبركة وتصلح جزيرة العبيدية من الاوبئة الفيها

[شمس الشموس]

بالله خبرونا وصل النيل الى وين عشلن نعايش الوضع معاكم و انشاء الله يجعلة نيل خير وبركة اة

[الفاتح الزبيرابي]

شكرا اخوتي ود العباس ابونضال كتاحة ود جار النبي العبيدية وشمس الشموس ... والبقية ... لمداخلاتكم ونشكر الاخ محمد طاهر العباس مجددا فقد علمنا عبره ان النيل في انحسار منذ امس واليوم ونسال الله ان لا يصاب اهلنا باضرار وخسائر بشرية ومادية وانت تكون الفيضانات والامطار سقيه لا عذاب ... ولكم خالص الود ولاهلي كل الوفاء فهم مرابطون على كل ثغور ولايتنا الكريمة ... ودمتم

[wad berber]

نسأل الله ان يجعلها سقيا خير ....
( تخريمه )
تحدثت اخبار الخرطوم عن ظهور تمساح ضخم على شواطىء النيل الازرق با القرب من توتى ..
( انتهى الخبر )
نتمنى ان يستمر التمساح فى تحركه شمالا وحتى دار جعل وهناك يتوقف ويا خد ود شندى فى ايدو
ويواصل الرحله شمالا ويستقبله الحواشى فى بربر ويبحث معه ما يستجد من ( خطفات )
وفى طريقه يتناول كرنديس ويواصل الى حيث تواجد الصيد الثمين الصادق العبيديه ..
ونواصل

[wad berber]

وفى الرحله شمالا وقريبا من المشرع حيث يتواجد ( التحليه ) ..
اه واه انا من التحليه .. فى الانتظار هغ هغ هغ الزبيرابى واخوه ود جار النبى .
وهناك فى شيمة ود الشيخ بين الباوقه وارتولى تكون المزه .. ومسك الختام .

[محمدطاهرالعباس]

كويس ياود بربر جعلت نهاية الرحلة ود الشيخ مربط مياه العبيدية الجديد وكنا خايفين توصلو الرباطاب ونكون أحد أصناف وجبه التمساح الدسمة

[ود النعيمة]

اللـــهـــــم اجعلها امـــــطار خير وبركــــــــه

[wad berber]

كويس ياود بربر جعلت نهاية الرحلة ود الشيخ مربط مياه العبيدية الجديد وكنا خايفين توصلو الرباطاب ونكون أحد أصناف وجبه التمساح الدسمة
ههههههههههههههههههههههه
ودالعباس ما تستعجل عليه ( قرمشتك ) ..
القرمشه ماشه عليك .

[ود شندى]

نسأل الله ان يجعلها سقيا خير ....
( تخريمه )
تحدثت اخبار الخرطوم عن ظهور تمساح ضخم على شواطىء النيل الازرق با القرب من توتى ..
( انتهى الخبر )
نتمنى ان يستمر التمساح فى تحركه شمالا وحتى دار جعل وهناك يتوقف ويا خد ود شندى فى ايدو
ويواصل الرحله شمالا ويستقبله الحواشى فى بربر ويبحث معه ما يستجد من ( خطفات )
وفى طريقه يتناول كرنديس ويواصل الى حيث تواجد الصيد الثمين الصادق العبيديه ..
ونواصل
نسال الله ان تكون سقيا خير وبركه
انت عارف ياودبربر فى قريتنا اشهر صايدى التماسيح ويستعان بهم على مستوى الولايه واشهرهم ود الحفار
نحن لمن يصطادو تمساح تشم ريحة الشى على بعد ميل ناسنا بياكلو التماسيح وفيها شرموط لا يضاهيه اى شرموط يعنى التمساح اكان وصلنا ميت ميت
بعدين تمساح شنو الكبير فى الخرطوم الخرطوم ملانه تماسيح ضخمه

[علي جارالنبي]

وفى الرحله شمالا وقريبا من المشرع حيث يتواجد ( التحليه ) ..
اه واه انا من التحليه .. فى الانتظار هغ هغ هغ الزبيرابى واخوه ود جار النبى .
وهناك فى شيمة ود الشيخ بين الباوقه وارتولى تكون المزه .. ومسك الختام .


تغووووووووووص وترجع ياود بربر

وللقاضي المقيم بشكيك هناك في بربر
رافــــع دعوتــــــــي زولاً تعب وإدردر
مغلوب ما بطيــــــــق أناتني تب مابقدر

يعني الشيمة الرميتنا فيها قُبل دا ما كفتك .......جائي ترمينا في شيمة ودالشيخ كمان ؟؟؟
شيمة ود الشيخ نحن متدربين عليها والله أشنوه يالزبيرابي ؟؟؟

قالوا الحال إنجلا رجع البحـــــــر وإنحـــدّر
وما أنكسروا الرجال حديد الطواري أنكسر

يارب ياكريم بعد الكسـور تنجبر
حُكم السيد رضا كان العبد يصبّر

[wad berber]

هههههههههههههههههههههههههههههه
ود جار النبى والله مشتاقين ...
وشوقنا بحر ..
اها اخبار الشواكيش شنو ..
وشيمة ود الشيخ بيه تقدر عليها ..
ولا فنجرية خشم ساكت ..

[العبيدية]

محمد طاهر بالمناسبة اخبار مياه العبيدية شنو وشبكة الكهرباء العبيدية

[الفاتح الزبيرابي]

كلكم اشكركم ::::::::::::::: ولقد علمنا الآن ان النيل في انحسار وانخفاض والحمد لله لا خوف على اهلنا الكرام بالولاية قاطبة .
ود بربر .... ؟؟؟ شكرا جزيلا لبث هذا الخبر العاجل ( التمساح الهارب ) ولومك بي التمساح دا مابيصلنا لانو زي ماقال ليك ود شندي ناس ود الحفار قاعدين ليه تحت في حلة الكنوز بشندي الشقالوة وكمان في المسيكتاب راجينه صيادين عمالقه مش تمساح لو جئت انت ذاتك يقبضوك في شباكهم دي ههههه. اما كرنديس و الزبيرابي وود جار النبي ديل ماتخاف عليهم ديل تمسايح بحر من الله خلقهم يعني التمساح مابخاف من تمساح، ياناس هناي الطار من الممتاز وراح هههههههه . ونلتقي

[علي جارالنبي]

هههههههههههههههههههههههههههههه
ود جار النبى والله مشتاقين ...
وشوقنا بحر ..
..

ود بربر ......... الشوق بحر وأنا تمساحُه

[محمدطاهرالعباس]

تحية ليك ياالفاتح وسلام ياود جار النبى بعد غد ناوين زيارة بلدتيكم العزيزتين العبيدية والباوقة بأذن الله لعكس إبداعات طلاب المدارس بدعوة كريمة من أسرالمدارس بالمنطقتين .. بس خوفنا من التمساح وخاصة حانعدى ببنطون الباوقة قريب من شيمة ود الشيخ والبادراب

[الفاتح الزبيرابي]

تحية ليك ياالفاتح وسلام ياود جار النبى بعد غد ناوين زيارة بلدتيكم العزيزتين العبيدية والباوقة بأذن الله لعكس إبداعات طلاب المدارس بدعوة كريمة من أسرالمدارس بالمنطقتين .. بس خوفنا من التمساح وخاصة حانعدى ببنطون الباوقة قريب من شيمة ود الشيخ والبادراب


والله شئ جميل ياود الطاهر ان تصنعوا المعجزات وتكتشوفوا مواهب وابداعات طلابنا التي غيبها الاعلام ردحا من االزمان فلكم التحية انتم ابناء منطقة وشغلكم الشاغل انسان وبئية هذه المنطقة قاطبة.

اما بخصوص التمساح افووووووووو ياود الطاهر تمساح ود الشيخ بخوفك ؟؟؟؟ معروف عن اهلنا الرباطاب كلهم ( دابي الليل ) وتمسايح دميره عشان كدا ود بربر دا مريخابي حاقد ماتشتغلوا بي كلامه اتوكلوا على الله امشوا في مشيكم تصحبكم السلامة ... وصية خاصة ... عبرك تحياتي لكل الاهل شرق وغرب ... ودمتم

[محمدطاهرالعباس]

أشكرك أخى الفاتح ولومك بى ماخايفين من التمساح وكان ختطفنا فى رجال بى يطلعونا من خشمو كان شرق كان غرب .. وتحياتك تصل

[wad berber]

ود العباس جانى خبرو وقالوا احمر وهاج ..
والتمساح يبرا منه ود العباس ..
التمساح يا ود العباس ليه ناس ( هناى ) وبس ..
تمشى وتجى با السلامه وسلم لى عليه ناس الباوقه ..

[wad berber]

والله شئ جميل ياود الطاهر ان تصنعوا المعجزات وتكتشوفوا مواهب وابداعات طلابنا التي غيبها الاعلام ردحا من االزمان فلكم التحية انتم ابناء منطقة وشغلكم الشاغل انسان وبئية هذه المنطقة قاطبة.
اما بخصوص التمساح افووووووووو ياود الطاهر تمساح ود الشيخ بخوفك ؟؟؟؟ معروف عن اهلنا الرباطاب كلهم ( دابي الليل ) وتمسايح دميره عشان كدا ود بربر دا مريخابي حاقد ماتشتغلوا بي كلامه اتوكلوا على الله امشوا في مشيكم تصحبكم السلامة ... وصية خاصة ... عبرك تحياتي لكل الاهل شرق وغرب ... ودمتم
هغ هغ هغ هغ هغ هغ هغ هغ هغ هغ

[محمدطاهرالعباس]

ياود بربر أحمر وهاج ؟ ؟ كان كدا مامنو خوف دا